ماليش نفس اتكلم

فى حاجات كتير اوى كنت عايز اتكلم فيها
بس حقيقى ماليش نفس حاليا

عموما هاسيبكم مع أغنية قلبى و ده حوار بينى و بين قلبى و عقلى عن فلسطين
الاغنية من كلماتى وبصوتى

دوووس هناهو

اغلى جزمة ف العالم

حد سمع عن متحف الجزم - الأحذية- اللى هايعملوه ف العراق ده؟؟
اصلهم ناويين ياخدو جزمة أشهر صحفى ف تاريخ العراق و ربما فى تاريخ العالم
منتظر الزيدى ذو ال 29 ربيعا و خريفاً و يعملولها متحف مخصوص ف العراق
اه صحيح.. نسيت اقول ان الزيدى كان حاضر للمؤتمر الصحفى الاخير للرئيس الامريكى بوش
و ده كان امبارح - الاحد- بالليل و الراجل حس فجأة انه اتخنق من بوش
و من عمايله ف راح بكل بساطة خلع جزمته - الفردتين- و حدفهم على بوش بكل بساطة كدة
و بدون سابق انذار و انا حاطط فيديو بيوضح الكلام ده
و عموما احيى جرأة هذا الرجل
و مدرب فريق العراق بالمناسبة اعلن انه على استعداد لشراء جزمة الزيدى ب 100 ألف دولار
بس انا شايف انها تتحط ف متحف للذكرة احسن
و بقول لبوش ف النهاية
زيارة سعيدة و مستنيين 20 يناير بفارغ الصبر
و ان شاء الله هانحتفل ب رأس السنة الجديدة يوم 19 يناير القادم
و لما المتحف يتفتح الميكروباص موجود هاعمل رحلة وبأسعار رمزية
نلتقى بعد شوية

ملحوظة رفيعه
الصين بقالها 20 يوم بتزود انتاجها من الزيـر و القلل
نظرا لزيادة الطلب على مستوى العالم
مصر استوردت حتى الان 2 مليار زيـر و 200 مليون قللة
و طبعا رخص المنتج الصينى هو سبب الاقبال الشديد
بس ياترى الناس دى عايزة القلل ف ايه؟
نستنى ليوم 20 و احنا نعرف

ملحوظة ارفع
الارقام دى انا جايبها من بيتنا طبعا :D

الفرق بين الشبه الطبيعى و التقليد

الفرق بين الشبه الطبيعى و التقليد

عدم التخصص فى الشئ يسبب الخلط عند العامة

على طريقة

اللى مايعرفش يقول عدس

نقيس على كدة ف الفن كتير اوى

نلاقى مطرب عمل اغنية هاوس مثلا و مطرب تانى عمل اغنية هاوس برضه

يطلع حبة ناس يقولو.. الراجل ده قلد ده

هما فاكرين انهم صح و مايعرفوش ان فى حاجة اسمها هاوس

ممكن اى حد يعملها

و خد عندك الايقاع المقسوم مثلا اللى نص اغانينا بقت كدة

ده ف الموسيقى

نلاقى ف الصوت.. فى حاجة يا جماعه اسمها عربة بضم الواو

تقريبا كل مطربين زمان كانو يمتلكو العربة دى

و حاليا المتخصص فيها اوى عمرو دياب و نلاقى

رامى صبرى على سبيل المثال عنده برضه نفس العرب دى

تقريبا.. و الراجل بيحاول يظهرها ف اغانيه

لانها مش حاجة عيب بالعكس ده دليل على قوة الصوت

يروح ناس طالعين ويقولو رامى بيقلد عمرو

يعنى لازم الراجل يغنى شعبى يعنى عشان مايتقالش

بيقلد عمرو؟؟

ده حتى بتوع الشعبى اللى صوتهم حلو بيحاولو يظهرو

موضوع العرب ده برضه

ف الكلمات

ان لم نكن وصلنا لهذا الزمن ف احب اقول اننا داخلين

على زمن تتشابه فيها مش بس الالحان و التوزيعات لأ

و الكلمات كمان.. و مسيرى هارجع افكركم

نبص لكل البوم لكل مطرب هانلاقى اجمالى الاغانى

اللى فيها افكار جديدة لانج لا تتعدى 3 من 10

و التحدى من العلبة

انا حاسس انى طولت اوى.. بس هاقول ف الاخر كلمة رفيعه

قبل ماننتقد حد.. ف الحانه او طريقه غنائه او كلماته

نشوف الاول هل هو فعلا حد موهوب ولا كل مهمته ف الحياة التقليد و بس؟

نلتقى بعد شوية

مصطفى سعد

--------------------

هذا الموضوع لايخص فنان بعينه والامثلة به للتوضيح فقط **

العرب بضم الواو و كمثال..عمرو دياب اغنية اعمل ايه من البوم تملى معاك ف الكلمات **

اختاره.. ناره.. اشواقه..اشتاقو..ايامه

ramy sabri

رامى صبرى

ابداع ضد التيار

اخيرا و منذ حوالى الثلاثة ايام تم طرح البوم رامى صبرى غمضت عينى ف الاسواق

بس انا مش قادر افهم ليه ده بيحصل مع رامى و بدون ادنى تحييز.. هاقولكم الاحداث بالترتيب

من اول كليب اتعمل..بيقلد عمرو دياب صوت وصورة

وقلنا يا جدعان هو شكله كدة والله بدون عمليات تجميل ولا حاجة

واذا كان عالصوت ف اى حد فينا نفسه يكون عمرو دياب.. دى مش شتيمة

بس لو صوته زى عمرو ده معناه انها حاجة كويسة مش حاجة ضده

بعد كدة استلمته عالم الفن بقناتيها مزيكا و زووم

الاخ ابن عجب و شريط الفن ..بدا يكتب بكل صفاقة عن رامى و طبعا مابيقولش انه رامى بس ماشاء الله عليه بيقول الفنان شبيه عمرو دياب و ف الخبر اللى بعده يكتب نقلا عن مجلة كذا بيقولو ان رامى صبرى بيقلد عمرو دياب ده عشان الناس اللى ماعرفتش هو مين

و بدأ يرمز لرامى بعدها بالفنان ال حـ - رامى

قلنا قلة ادب و هاتعدى

لقينا شركة ستار جيت المنتجة للالبوم و برعاية الفنان المبدع طارق اللى مش متغطى... العريان سابقا

بيبيع رامى بيسلموه لميلودى مع حبة توصيات

و من هنا بدأت رحلة العذاب.. الالبوم ف 7 لأ ف 8 و ف النهاية

تم تسريب 6 اغانى من الالبوم بخلاف فيديو كليب ل كلمة و بذلك اصبح

اجمالى المتسرب من الالبوم 7 اغانى فقط و قبل رمضان بأيام

ف تم تاجيل الالبوم للعيد مع وعد من رامى انه هايعمل اغنيتين جداد

و فعلا الراجل عمل اغنيتين .. و الحمد لله اول مارمضان خلص كانو اتسربو و برضه الالبوم مانزلش

ف النهاية شركة ميلودى دخلت ف دور عند مع رامى و طبعا ستار جيت بخخخ

و نزل اخيرا الالبوم بعد ضياع مجهود رامى و اللى بجد بيأكد انه بيسبح ضد التيار

و ده دليل نجاحه و ابداعه اللى باين بجد ف الالبوم من حيث الاداء و الكلمات و الالحان و التوزيعات

ولا املك الا ان اقول لكل من حاربه و يحاربه بهذا الشكل البشع

حسبى الله و نعم الوكيل

ان شاء الله هاروح اكنسسس عليكم السيدة و اكشف راسى و ادعى عليكم

نلتقى بعد شوية

Obama

obama

Series 24 .. When a dream comes true

...........

منذ حوالى 7 سنوات و تحديداً فى 2001 ظهرت ف امريكا مسلسل بعنوان 24 ورغم بساطة العنوان ولكن المضمون يحتوى الكثير من التشويق و الاثارة

و برعاية العميل جاك باور CTU فكرة المسلسل عبارة عن قيام وكالة الاستخبارات الامريكية

بأحتواء أزمة كبيرة فقط خلال 24ساعه و هنا دور الاخراج الاكثر من رائع فى استعراض احداث اليوم

ثانية ب ثانية و بانتهاء احداث اليوم ينتهى المسلسل

MBC يعرض الآن الجزء السادس منه على قناة

فى امريكا FOX ويبدأ عرض الجزء السابع على قناة

من يناير القادم ... هاتكلم عن المسلسل ده تفصيليا فيما بعد لكن انا عايز اتكلم ف حاجة محددة حاليا

ف الجزأ الأول من المسلسل ده كانت بتدور احداثه عن ان فى سيناتور اسمر اسمه ديفيد بالمر

مرشح نفسه لرئاسة امريكا .. و استعرض الجزأ ده المشاكل الكبيرة اللى واجهت السيناتور ده

ومحاولات الاغتيال الكتيرة اللى اتعرض لها وازاى ناس كتير ماكنتش عايزاه يوصل للحكم

و ف النهاية اكتشفنا ف الموسم التانى انه اصبح رئيس لأمريكا فعلا

لحد كدة و قلنا .. خليهم يحلمو - الحلم مش عيب

بس الواضح ان الحلم فعلا تحول الى حقيقة و بكامل تفاصيله

مرت 7 سنين و جه واحد اسمر اسمه اوباما و رشح نفسه و برضه اتعرض لمحاولات اغتيال

و لسة باقى الاحداث اللى كانت ف المسلسل و بالفعل فاز ف الانتخابات

انا بوجه رسالة لكل المتشائمين .. إحلمو يا جدعان .. مش عيب والله

يمكن تصحو ف يوم من نومكم تلاقو الحلم حقيقة ادامكم

____________________

تعليق صغير عالانتخابات الامريكية من خلال متابعتى

.................

اقبال الشباب كان غير عادى و دى حاجة ليها مدلول حضارى جامد جدا

الناس كانت بتقف بالاربع ساعات عشان تنتخب..ليه خيير؟؟

و على سبيل المثال كانت بتظهر نتائج فرز الاصوات لحظة بلحظة CNN قناة

و ف كل مركز انتخابى ف كل حتة ف امريكا ..اعتقد دى قمة الشفافية

لما نشوف Change عنوان حملة اوباما الرئيسى كان

___________________
جميع حقوق النشر محفوظة لكاتبها مصطفى سعد و كل من يقتبس او يحصل على أيا منها دونالرجوع لكاتبها يبقى ... حرامى و هايخش النار ان شاء الله

تعرف تحمد ربنا؟2

تعرف تحمد ربنا؟

الجزا الثانى

انا عايز بس اكمل الموضوع ف الجزأ الاول و اقول .. تعرف تتواضع لله؟

تعرف تنسب اى حاجة حلوة بتعملها لفضل ربنا عليك مش لمجهودك الشخصى؟

ماهو ده نوع من انواع الحمد برضه.. انك تتواضع لله

حضرتك تشوف اتنين بيتخانقو ف تتدخل و تحل المشكلة.. بعدها

تتباهى ادام كل الناس .. شوفتو انا حليت المشكلة ف 5 دقايق ازاى؟

طيب ماهو لو الناس دى كانت دماغها ناشفة ماكنتش هاتحل حاجة

انت بس ربنا جعلك سبب .. ليه ماتقولش

الحمد لله اقدرت بفضل الله احلها

او تقول زى ماقلنا المرة اللى فاتت

"الحمد لله الذى هدانا لهذا و ماكنا لنهتدى لولا ان هدانا الله"

تبقى سايق عربيتك الخاصة و ماشى على طريق و جمبك ميكروباص او اتوبيس

نقل عام مثلا و الناس متكدسة فيه .. تبصلهم باستغراب و تزود السرعه علشان

توريهم الهنا اللى انت فيه .. طيب مانت ممكن وانت بتزود السرعه العربية

تفصل منك ولا الكاوتشة تعملها معاك و تركن على جمب يا حلو

ليه ساعتها لما يجيلك الاحساس ده ماتقولش

"الحمد لله الذى سخر لنا هذا و ماكنا له مقرنين"

بلاش غرور و تكبر يا بنى ادمين .. كلنا عباد لرب واحد فقط

واحنا مهما كان شأننا مانجيش بحجم ناموسة ف مُلك ربنا

يبقى ليه بقى مانعترفش بفضل ربنا علينا و نحمده دايما

وفى النهاية

الكبر و الغرور احد انواع الشرك الاصغر - حسب اراء كثير من العلماء

لا يدخل الجنة من فى قلبه مثقال ذرة من كبر - حديث شريف

من تواضع لله رفعه - حديث شريف

___________________

جميع حقوق النشر محفوظة لكاتبها مصطفى سعد و كل من يقتبس او يحصل على أيا منها دونالرجوع لكاتبها يبقى ... حرامى و هايخش النار ان شاء الله

تعرف تحمد ربنا؟

تعرف تحمد ربنا؟

الجزأ الأول

حاجات كتير اوى بتحصل ف حياتنا و احنا مش عارفين هى بتحصل ليه وساعات

مش بنعرف ان الحاجات دى حلوة الا بعد فترة من حدوثها

تلاقى نفسك وانت ماشى ف الشارع فجأة تقرر انك تغير مسارك من يمين

الشارع لشمال الشارع و توصل لاخر الشارع تسمع زيطة على اوله

اصل نفس المكان اللى انت كنت ماشى فيه قبل ماتغير مسارك واحد

مشى فيه بعدك و وسقط ف حفرة.. وانت كان يفصلك عنها متر واحد فقط

تبقى راكب ميكروباص علشان تسافر من مكان لمكان و قبل مايتحرك

تفتكر انك نسيت حاجة ف البيت و لازم تروح البيت .. وتروح و انت

متضايق .. هاترجع تانى الموقف امتى و تلاقى ميكروباص ازاى

ولما ترجع و تاخد ميكروباص تانى تلاقى الاولانى راكن على جمب

ف الطريق - اصله تعطل وهو ماشى

تبقى قاعد مع اصحابك على كافيه و ابوك او امك يتصلو بيك

احضر فورا .. وتقوم وانت فى قمة الأرف.. هاسيب اصحابى واقوم؟

و بمجرد ما توصل البيت تلاقى تليفون من واحد من اصحابك دول بيقولك

الحقنا..احنا ف القسم.. البوليس جه قبض على كل اللى ف الكافيه مش عارفين ليه

و مواقف كتير اوى لو فضلت احكيها هاكتب صفحات

ماحدش فكر مين دبّر كل المواقف دى؟؟

ماهو اكيد مش انت اللى غيرت مسارك وانت ماشى بمزاجك

ولا انت اللى غيرت الميكروباص عشان كنت عارف انه هايتعطل

ولا انت كمان اللى قررت تروح بيتكم من نفسك كدة

دى حكمة ربنا وارادته.. ياترى بنبقى عارفين كدة ف وقتها؟

طيب ياترى ف كل موقف من دول اول حاجة بتعملها بتقول

الحمد لله؟؟

طيب و ياترى لو حصلتلك مصيبة اول حاجة بتعملها بتقول

الحمد لله؟؟

و بتفتكر الحاجات الحلوة اللى ربنا اداهالك و تقول ماهو رزقنى كتير

ايه المشكلة لما تحصل لى مشكلة؟ اكيد هايساعدنى فيها برضه

انا طولت اوى انا عارف.. حقيقى الموضوع يستحق اكتر من كدة

بس ف النهاية هاقول حبة حاجات كعناوين

دائما تحمد الله = دائما تعيش حياتك فى رضا تام بالحلو و الوحش

دائما تحمد الله = دائما يزيد رزقك

حديث شريف.. كلمتان خفيفتان على اللسان ثقيلتان فى الميزان حبيبتان الى الرحمن

"سبحان الله و بحمده سبحان الله العظيم"

عند ركوب اى وسيلة مواصلات خاصة أو عامة

"سبحان الذى سخر لنا هذا و ماكنا له مقرنين"

عندما تنجز اى عمل صالح او تقوم بمساعدة اى شخص فى حاجة له

"الحمد لله الذى هدانا لهذا و ماكنا لنهتدى لولا ان هدانا الله"

واخيرا

"الحمد لله رضا نفسه و زنة عرشه و عدد خلقه و مداد كلماته"

______________________

جميع حقوق النشر محفوظة لكاتبها مصطفى سعد و كل من يقتبس او يحصل على أيا منها دونالرجوع لكاتبها يبقى ... حرامى و هايخش النار ان شاء الله